སྟག་རི་གཉན་གཟིགས།
༡༠༽ དེ་ནས་བཙན་པོས་བྱིན་རྟེན་རྣམས་ཕོ་བྲང་ཡུམ་བུ་བླ་སྒང་གི་ཡང་ཐོག་ཏུ་བསྐྱལ་ནས་གནམ་ནས་བབས་སོ་ཞེས་བསྒྲགས་ཤིང་མཆོད་པས། ཕོ་བྲང་དུ་འཇའ་ཤར་བ་སོགས་བཀྲ་ཤིས་པའི་ལྟས་བཟང་མང་པོ་བྱུང་བས་རྒྱལ་པོ་ཡང་ངོ་མཚར་བླ་ལྷག་ཏུ་སྐྱེས།
༡༡༽ དེ་ནས་མཚན་མོ་བཙན་པོའི་རྨི་ལམ་ནང༌། ནམ་མཁའ་ནས་འོད་དང་སྒྲ་བྱུང་སྟེ། མི་རབས་ལྔའི་རྗེས་སུ་འདིའི་དོན་རྟོགས་ཤིང་དར་བར་བྱེད་པའི་རྒྱལ་བུ་ཞིག་འབྱུང་ངོ༌། །ཞེས་ལུང་བསྟན་ཐོབ།
༡༢༽ དེ་ནས་བཙན་པོས། འདི་ནི་གཉན་པོ་གསང་བའོ་ཞེས་ལྷ་ཁང་དུ་བཞུགས་སུ་གསོལ་ནས་རྟག་ཏུ་ཕྱག་མཆོད་བྱས་པས། རྒྱལ་པོ་སྐུ་ཚེ་རིང་བར་གྱུར་ནས་དགུང་ལོ་བརྒྱ་དང་ཉི་ཤུའི་བར་དུ་འཚོ་ཞིང་བཞུགས་པར་གྲགས།
༡༣༽ དེ་ཡང་དུས་རྒྱུན་བོད་མིའི་ཁ་དཔེ་ལ། མདོ་ལ་སྔ་བ་ཟ་མ་ཏོག་དང༌། །གཟུངས་ལ་སྔ་བ་ཙིན་ཏ་མ་ཎི། །ཞེས་གྲགས་པ་བཞིན། སྐབས་འདི་ནས་བཟུང་བོད་ལ་གཞུང་འབྲེལ་གྱི་དམ་པའི་ཆོས་ཐོག་མར་དབུ་བརྙེས་པར་གྲགས་སོ། །
༡༤༽ བཙན་པོ་ལྷ་ཐོ་ཐོ་རི་གཉན་བཙན་གྱིས་རྣོ་བཟའ་མང་དགའ་ཞེས་པ་བཙུན་མོར་བཞེས་པས། སྲས་ཡིད་དུ་འོང་བ་ཞིག་འཁྲུངས། སྲས་ཀྱི་མཚན་ལ་ཁྲི་གཉན་གཟུང་བཙན་ཞེས་གསོལ་ཏེ། བཙས་སྟོན་གྱི་རྟེན་འབྲེལ་ཡང་རྒྱ་ཆེར་མཛད།
For the audio files